ചെറായി: ബന്ധുവായ വിദ്യാർഥി വഴി പരിചയപ്പെട്ട പതിനാറു വയസുകാരിയെ സോഷ്യൽ മീഡിയ വഴി പ്രണയിച്ച് കടത്തിക്കൊണ്ടുപോകുകയും പീഡിപ്പിക്കുകയും ചെയ്ത സംഭവത്തിൽ മുനമ്പം പോലീസ് അറസ്റ്റ് ചെയ്ത യുവാവ് റിമാൻഡിൽ.
പറവൂർ കൈതാരം മാലിപ്പുറത്ത് നികത്തിൽ വീട്ടിൽ ശ്യാം – 19 ആണ് റിമാൻഡിലായത്. വെള്ളിയാഴ്ച രാത്രി പ്രായപൂർത്തിയാവാത്ത പെൺകുട്ടിയെ ചെറായിലുള്ള വീട്ടിൽനിന്ന് ഇറക്കിക്കൊണ്ടുപോയതിനെതുടർന്ന് പിതാവ് നൽകിയ പരാതിയിൽ രാത്രി തന്നെ പെൺകുട്ടിയെ ഇയാളൊടൊപ്പം മുനമ്പം പോലീസ് കണ്ടെത്തുകയും കേസ് എടുക്കുകയും ചെയ്തിരുന്നു.
തുടർന്ന് പെൺകുട്ടിയിൽനിന്ന് വനിതാ പോലീസുദ്യോഗസ്ഥ വിശദമായി കാര്യങ്ങൾ ചോദിച്ചു മൊഴിയെടുത്തപ്പോഴാണ് ഈ മാസം 18ന് ഇയാൾ കുട്ടിയെ കുഴുപ്പിള്ളി ബീച്ചിൽ കൂട്ടിക്കൊണ്ടുപോയി ആളൊഴിഞ്ഞ സ്ഥലത്തു വച്ച് ബലാൽസംഗം ചെയ്തതായി പെൺകുട്ടി പറഞ്ഞത്.
തുടർന്ന് പോക്സോ വകുപ്പ് കൂടിചേർത്ത് കേസെടുത്ത് പ്രതിയെ അറസ്റ്റ് ചെയ്ത കോടതിയിൽ ഹാജരാക്കുകയായിരുന്നു.മുനമ്പം സിഐ എം. വിശ്വംഭരൻ, എസ്ഐ ടി.എസ്. സനീഷ്, ടി.കെ. രാജീവ്, എഎസ്ഐ രശ്മി, ജിനി, സിപിഒ പി.എ. ജയദേവൻ എന്നിവരടങ്ങിയ സംഘമാണ് കേസ് അന്വേഷിച്ച് പ്രതിയെ അറസ്റ്റ് ചെയ്തത്.
